कालानुरुप बातम्या
ताज्या बातम्या
मास्क वापरा अन्यथा दंडात्मक कार्यवाही होणार
दोडाईचा शहरात कोरोनाचा प्रादुर्भाव कमी असला तरी कोरोना वाढण्याची भीती कायम असल्याने नागरिकांनी बाहेर जाताना मास्क वापरले पाहिजे, परंतु नागरिकांमध्ये कोरोनाची भिती दिसून येत नाही, त्यामुळे मास्क वापरत नाही. आज गुरूवारी बाजाराचा दिवस असल्याने गर्दी होत असते, सदर गर्दी टाळण्यासाठी व लोकांनी मास्क वापरावे म्हणून दोडाईचा पोलिस व नगरपालिका प्रशासनातर्फे शोध मोहीम राबवण्यात आली. दोडाईचा पोलिस स्टेशनचे पोलीस अधिक्षक पंकज कुमावत, नगरपालिका मुख्यधिकारी निकम यांच्या मार्गदर्शनाखाली छत्रपती शिवाजी महाराज पुतळ्यापासुन तपासणी मोहीम राबवण्यात आली, ज्यांनी मास्क लावले नाही त्यांना दंड आकारणी करून पुन्हा विना मास्क दिसले तर कार्यवाही केली जाईल अशी ताकिद देत कार्यवाही करण्यात आली, या कार्यवाही पथकात पोलिस हवलदार साळवे, गुजराती, नगरपालिका कर्मचारी शिवाजी मराठे, महेंद्र शिंदे, सुधिर माळी, प्रकाश लहामगे, गोविंद मराठे, नितीन चौधरी, वसंत जोशी, धर्मेंद्र मोहीते आदींनी सहभाग घेतला.
मच्छीमारांना लवकरच मिळणार डिझेलवरील परतावा-अस्लम शेख
मुंबई दि.०३ : २०२० व २०२१ या आर्थिक वर्षामध्ये डिझेल परताव्यासाठी रु.६० कोटींची तरतुद करण्यात आली होती. परंतू कोरोना विषाणूच्या पार्श्वभूमीवर त्यातील फक्त रु. १९.३५ कोटी रक्कमच मत्स्यव्यवसाय विभागाला वितरीत करण्यात आलेली आहे. उर्वरीत रु. ४०.६५ कोटी लवकरात-लवकर वित्त विभागाकडून मत्स्यव्यवसाय विभागास वितरीत करण्याची मागणी राज्याचे मत्स्यव्यवसाय मंत्री ना.अस्लम शेख यांनी राज्याचे अर्थमंत्री अजित पवार यांच्याकडे पत्राद्वारे केली आहे.
मत्स्यव्यवसाय मंत्री अस्लम शेख यांच्या मागणीला अर्थमंत्री अजित पवार यांनी सकारात्मक प्रतिसाद दिला असून डिझेल परताव्याची उर्वरीत रक्कम विशेष बाब म्हणून मत्स्यव्यवसाय विभागास तात्काळ वितरीत करण्याचे आदेश अर्थमंत्र्यांनी राज्याच्या वित्त सचिवांना दिले असल्याची माहिती मत्स्यव्यवसाय मंत्री अस्लम शेख यांनी दिली आहे.
ना. अस्लम शेख यांनी दिलेल्या माहितीनुसार भाजपा सरकारच्या काळात डिझेल परताव्याचा अनुशेष वाढत गेला. हा अनुशेष भरुन काढत आतापर्यंत रु.११० कोटींपर्यंत डिझेल परतावा मच्छीमारांना देण्यात आला आहे. अर्थमंत्री अजित पवार यांच्याकडे पत्राद्वारे डिझेल परताव्यासाठी १८९ कोटींची पुरक मागणी करण्यात आलेली असून या मागणीलाही सकारात्मक प्रतिसाद अर्थमंत्र्यांनी दिला आहे.
महाराष्ट्रात सध्या १६० मच्छीमार सहकारी संस्थांच्या ९६४६ यांत्रिकी नौकांना डिझेल कोटा मंजूर करण्यात आलेला आहे.
पत्रकारीता हे लोकहित जोपासणारे क्षेत्र पोलीस उपअधीक्षक श्रवण दत्त
जागृत महाराष्ट्र न्यूज
जिंतूर (०३/१२)
पत्रकार हा लोकहिताचे कार्य करतो. पत्रकारितेच्या माध्यमातून सामाजिक काम केले जाते. त्यामुळे पत्रकारिता एका अर्थाने लोकहीत जोपासणारे क्षेत्र आहे. असे प्रतिपादन पोलीस उपअधीक्षक श्रवण दत्त यांनी जिंतूर येथील सत्कार सोहळ्याच्या कार्यक्रमात व्यक्त केले.
जिंतूर येथे तालुका मराठी पत्रकार संघाच्या वतीने बुधवार दि. २ डिसेंबर रोजी ज्येष्ठ पत्रकार राजाभाऊ नगरकर यांचा जिंतूररत्न पुरस्कार मिळाल्याबद्दल सन्मान करण्यात आला. याप्रसंगी उपस्थित पत्रकार व प्रतिष्ठित नागरिक यांच्याशी संवाद साधताना पोलीस उपअधीक्षक श्रवण दत्त बोलत होते. कार्यक्रमाच्या अध्यक्षस्थानी कफिल फारुकी होते. प्रमुख पाहुणे म्हणून जिल्हा व्यापारी महासंघाचे उपाध्यक्ष ब्रिजगोपाल तोष्णीवाल, उपनगराध्यक्ष बाळासाहेब भांबळे, व्यापारी महासंघाचे शहराध्यक्ष रमेशराव दरगड, एम ए माजिद, निहाल अहमद, पोलीस निरीक्षक प्रमोद पाटील, पोलीस अधिकारी लोखंडे, नागरगोजे, निकाळजे उपस्थित होते.
पत्रकार संघाचे अध्यक्ष गजानन चौधरी, कार्याध्यक्ष शहजाद पठाण व सचिव गुणिरत्न वाकोडे यांनी संघाच्या वतीने जिंतूररत्न राजाभाऊ नगरकर यांचा सन्मान केला तर विनोद पाचपिल्ले, शेख शकील व शेख वाजिद यांनी संघाच्या वतीने पोलीस निरीक्षक प्रमोद पाटील यांचा स्वागत सत्कार केला. या प्रसंगी उपस्थित मान्यवरांनी मनोगत व्यक्त केले. कार्यक्रमाचे प्रास्ताविक संघाचे तालुकाध्यक्ष गजानन चौधरी यांनी केले सूत्रसंचालन शेख शकील यांनी तर आभार प्रदर्शन संघाचे कार्याध्यक्ष शहजाद पठाण यांनी केले. यावेळी जिंतूर व तालुक्यातील पत्रकार मोठ्या संख्येने उपस्थित होते.